Rueda destaca a estabilidade na Xunta nun contexto de incertezas

O presidente da Xunta Alfonso Rueda destacou este martes a importancia de contar con administracións que teñan "estabilidade" e ofrezan certezas "sen dogmatismos", sobre todo nun momento cuxos próximos meses están cheos de "incertezas".

Rueda presidiu a inauguración do XX aniversario da Asociación para o Progreso da Dirección (APD) zona noroeste, na que tamén interveu o seu presidente Francisco Botas e á que asistiu, entre outros empresarios e directivos, un dos seus antecesores e presidente de honra da organización Honorato López Isla.

"A estabilidade nos gobernos é moi importante, saber que non haberá vaivéns, que a administración cumprirá, sen sorpresas, sen cambios de última hora, sen cambios ideolóxicos. Iso é moito máis vantaxoso para que un país progrese", opinou.