Rueda anuncia a matrícula gratis nas ensinanzas artísticas superiores
A partir de setembro Galicia será ademais a primeira comunidade coa matrícula gratis para os universitarios que aproben, unha medida que será aprobada este luns no Consello da Xunta
O presidente da Xunta, Alfonso Rueda, avanza que a gratuidade dos estudos superiores anunciada para o próximo curso vaise estender ás ensinanzas artísticas. Díxoo nunha entrevista na Televisión de Galicia, a primeira que concede tras tomar posesión do cargo, na que tamén falou da nova estrutura do seu Goberno e dos retos para a lexislatura que acaba de comezar.
O xefe do Goberno galego afirmou que a Xunta traballa en cumprir o prometido durante a campaña para os cen primeiros días de Goberno. E confirmou que a partir de setembro Galicia será a primeira comunidade coa matrícula gratis para os universitarios que aproben; medida que se estenderá ás ensinanzas artísticas superiores, como música, deseño ou arte dramática.
Sobre os cambios de estrutura na Xunta, Rueda asegurou que é para adaptala aos novos tempos e destacou a creación da Consellería para Cultura, Lingua e Xuventude. O presidente dixo que "é fundamental" que a xente nova "siga coidando o noso idioma e as culturas tradicionais".
En materia económica, o xefe do Goberno galego defende que quere que as industrias do futuro, como a eólica mariña, estean en Galicia. E garantiu que a Xunta vixiará que cumpran todas as normas.
"As industrias que veñen a Galicia xa saben que se non cumpren todo iso aquí non se poden poñer, e iso é unha garantía para todos os veciños e veciñas que vaian ter unha industria cerca. Se cumpren, eu quero que se fagan en Galicia, tanto Altri, como outros proxectos que están enriba da mesa", explicou o presidente.
Alfonso Rueda critica que o BNG e "outros partidos" se opoñan a iniciativas "sen coñecer o que hai", cando están reclamando industrias. Dixo tamén que a Xunta seguirá reclamándolle ao Goberno a transferencia da AP9 e, mentres non chega, a gratuidade.
"O candidato socialista dixo nun debate nesta casa que ían suprimir as peaxes nas autoestradas titularidade do Goberno central. O resultado electoral foi o que foi pero supoño que o compromiso non depende de quen gañara, por iso imos insistir en que ese compromiso hai que cumprilo", afirmou Rueda.
