Raúl Castro participa nun acto público tras os rumores sobre a súa saúde
O expresidente cubano asegura que a revolución "vive días difíciles baixo a hostilidade dos EUA"
Con palmadas enérxicas, e entre vitores de militares, reapareceu Raúl Castro, o expresidente cubano, nun acto polo 65 aniversario da Dirección de Seguridade Persoal do Ministerio do Interior, segundo amosa un informe do noticieiro da televisión estatal.
Durante este retorno mediático, Castro estivo acompañado pola cúpula do Goberno, co presidente Miguel Díaz-Canel e o seu neto Raúl Guillermo Rodríguez Castro –interlocutor nas negociacións con Washington– á cabeza.
A presenza do líder da revolución no evento acala os rumores que circularon a semana pasada –en medios e redes sociais do exterior– que especulaban cunha hospitalización por un accidente cerebrovascular e mesmo coa súa morte.
"Días difíciles"
Raúl Castro, xunto ao seu irmán Fidel Castro (1926-2016), participaron na fundación en 1961 da Dirección de Seguridade Persoal para protexer fisicamente os principais dirixentes cubanos.
Durante o acto, o ministro do Interior, Lázaro Alberto Álvarez Casas, leu unha carta escrita por Raúl Castro na que recoñece o traballo do órgano e destaca os 32 cubanos que morreron o 3 de xaneiro cando trataban de protexer o expresidente de Venezuela Nicolás Maduro.
"A Revolución vive días difíciles baixo a hostilidade do Goberno dos Estados Unidos, que continúa empeñado en facer desaparecer o exemplo de Cuba no mundo".
A misiva fai referencia á complexa crise económica que atravesa a illa, agravada desde xaneiro tras o bloqueo petroleiro e as sancións por parte de Washington.
Ademais, Castro foi acusado formalmente nos Estados unidos o 20 de maio polo derrubamento en 1996 de dúas avionetas dunha organización cubana no exilio e da morte dos seus catro tripulantes.
A Casa Branca quere levalo ante un tribunal, o que espertou a pantasma de que executen contra el unha captura como a de Nicolás Maduro en Venezuela.
Conversas bilaterais
Tamén existen conversas bilaterais entre ambos os dous países, nas que participa o seu neto Rodríguez Castro. Estas negociacións volveron colocar o expresidente explicitamente no centro do taboleiro político, malia este deixar a dirección do país en 2018 e a do Partido Comunista de Cuba en 2021.
Esa distancia da escena política, sumada aos seus 95 anos de idade, amplifican cada certo tempo os rumores sobre o seu estado de saúde, especialmente cando as súas aparicións públicas non son tan frecuentes.
