Primeira derrota do Deportivo Abanca nun accidentado partido contra o Español (1-0)
O encontro estivo suspendido durante 50 minutos por culpa da chuvia, que anegou o campo
As españolistas superan o equipo coruñés na clasificación e pasan a ser as novas líderes
O Deportivo Abanca perdeu o primeiro partido da temporada no campo do Español (1-0), que pasa a ser o novo líder da Primeira Federación feminina.
Comezou moi forte o Español, con dous avisos sobre a portería de Yohanna. No terceiro (minuto 16) chegou o gol marcado por Mar Torres.
Pouco máis houbo que contar nun período inicial de escasas opcións. No descanso caeu unha tromba de auga que anegou o campo. A colexiada tivo moitas dúbidas para reiniciar o encontro e houbo que agardar 50 minutos para que se puidese poñer o coiro en movemento.
Os operarios do @RCDEFemeni traballan arreo para que poida continuar o partido contra o @RCDeportivoFem
— En Xogo tvG2 (@EnXogo_tvG2) October 15, 2023
👉 Mentres, no campo anexo os xogadores do @RCDEspanyol adestran con normalidade
Todo apunta a que se vai reiniciar en breve
En directo na G2 e G24📲 https://t.co/r0uJKY6kgo pic.twitter.com/jgfc67aJsv
O Deportivo entrou moi forte no segundo tempo con boas ocasións para ADT e Ainhoa Marín, pero co paso dos minutos o Español volveu controlar a situación e acabou levando a vitoria.
