Pechan as grandes webs porno en Francia como protesta contra a verificación de idade

As principais webs de pornografía pechan os seus dominios en Francia tras o comunicado da empresa Aylo, propietaria de empresas coma Pornhub, Youporn ou Redtube, para protestar polo control dos menores no país francés. Esta decisión implica un bloqueo dos seus contidos para os internautas a partir de hoxe.

Esta decisión foi oficializada a través dun comunicado de Aylo en que explican que prefiren resistirse ao cumprimento das leis francesas para loitar pola liberdade de expresión dos menores. En concreto, a empresa de producións pornográficas protesta contra unha lei francesa de maio de 2024 que pretende "dar seguridade e regular o espazo dixital" e cuxo cumprimento permitirá ao xendarme das telecomunicacións intervir contra as páxinas que non cumpran esta lei.

Neste comunicado, a empresa pornográfica tamén explica que o sistema de control de idade dos usuarios non se puxo a proba nunca a unha escala tan grande e vai crear altos riscos de pirateo e escape de datos. Todas estas explicacións acompáñanse dunha imaxe de Eugéne Delacroix, que transmite a idea de situarse en contra dos que limitan a liberdade de expresión. 

Como resposta a isto, a Autoridade de Regulación das Telecomunicacións (Arcom) criticou a decisión de Aylo. No seu comunicado, a Arcom explicou que existen moitas formas no mercado de garantir a verificación de idade e a protección de datos do usuario e insistiu no obxectivo das institucións europeas de protexer os menores en liña. 

Tamén se pronunciou a responsable do Goberno francés para a Intelixencia Artificial e a Dixital, Clara Chappaz, quen tamén criticou a posición de Aylo e "invitouna" a irse de Francia para non cumprir a lei. Ademais tamén asegurou que o dispositivo que ofrece a Arcom garante a privacidade á hora de verificar a idade e tratou de "inadmisible" a actitude da empresa de contidos pornográficos por non querer respectar a lei.