Os sindicatos médicos aprazan a folga indefinida pola convocatoria electoral pero manterán as mobilizacións

A Unión Médica e Facultativa (UMYF), confederación de sete sindicatos médicos autonómicos de recente creación, anunciou este mércores o aprazamento da folga indefinida polo Estatuto Marco ante o adianto electoral ao 29 de novembro, aínda que advertiu que manterá as mobilizacións e empraza o novo Goberno saído das urnas a atender as reivindicacións da profesión médica.

A protesta retomarase cando exista un novo Goberno "con plena capacidade para negociar".

A Unión Médica e Facultativa naceu o pasado mes de xuño para reclamar un Estatuto propio para o colectivo médico e reúne a Metges de Catalunya, está formada pola Asociación de Médicos y Titulados Superiores de Madrid (Amyts), O'Mega, Sindicato Médico de Galicia (Simega), Avanza Valencia, Sindicato Médico de Navarra e o Sindicato de Empleados Médicos de Canarias (Semca).

"O aprazamento non supón a desconvocatoria da folga nin a paralización da mobilización", advertiu UMYF, que explicou que realizará actos e accións de protesta co obxectivo de situar as reivindicacións médicas "no centro do debate político".

Os médicos e facultativos consideran que, no actual escenario político, é "máis útil" manter a mobilización e trasladar as súas reivindicacións ao debate electoral. Nesta liña, reclaman a todas as formacións políticas que concorran ás eleccións que se pronuncien "de forma clara" sobre o futuro da profesión médica e facultativa e incorporen aos seus programas o Estatuto Médico e Facultativo e as principais demandas do colectivo.

"O próximo Goberno terá que responder ás demandas da profesión médica e facultativa. De non facelo, a resposta volverá estar nas rúas de todo o país como se vén demostrando nos últimos meses", advertiu.