Filipe VI destaca na Pascua Militar o compromiso de España coa orde global baseada en normas

Filipe VI destacou este martes o compromiso de España coa seguridade internacional, o multilateralismo e coa orde global baseada en normas no seu discurso con motivo da Pascua militar, no que falou da sensación crecente de ameaza que deixa 2025, con guerras, crises e traxedias humanitarias.

Un discurso no que non fixo mención á operación dos Estados Unidos en Venezuela e no que subliñou, ante os múltiples conflitos bélicos e crises e a "ameaza" que chega ao corazón de Europa, o valioso que é contar cunhas Forzas Armadas cun alto grao de formación e adestramento e uns recursos humanos e materiais que estean á altura dos desafíos.

Os reis e a princesa Leonor presiden a cerimonia da Pascua Militar no Palacio Real, un solemne acto castrense que reúne á cúpula dos tres exércitos e da Garda Civil e á que non asistiu nesta ocasión o presidente do Goberno, Pedro Sánchez, xa que asistirá en París a unha reunión da Coalición de Voluntarios para Ucraína.

Si contou coa presenza dos ministros de Defensa, Margarita Robles, e de Interior, Fernando Grande-Marlaska. 

Robles avisa que non hai accións lexítimas posibles fóra do marco xurídico internacional

A ministra de Defensa, Margarita Robles, advertiu este martes, tras o ataque estadounidense a Venezuela (aínda que sen nomealo expresamente), a necesidade de respectar o ordenamento xurídico internacional, fóra de cuxo marco "non hai actuacións lexítimas posibles", dixo.

Así o sinalou Robles no seu discurso con motivo da celebración da Pascua Militar.

A ministra insistiu en que España é "un socio serio, responsable, fiable e comprometido" nos marcos internacionais aos que pertence, en defensa da paz, a seguridade e os valores democráticos que han de presidir a convivencia pacífica internacional.

E tras lembrar que máis de 175 militares españois faleceron en misións internacionais de mantemento de paz, dixo "humildemente": "non damos leccións a ninguén, pero tampouco as aceptamos nese compromiso que España ten".

Feijóo considera un "desplante o Exército" a ausencia de Sánchez na Pascua Militar

O líder do PP, Alberto Núñez Feijóo, criticou este martes a ausencia do presidente do Goberno, Pedro Sánchez, na celebración da Pascua Militar, o que considerou "un novo desplante" o Exército por parte do máximo representante do Executivo.

"Un presidente digno do seu país debería estar co xefe do Estado nun día como o de hoxe", sinalou Feijóo nunha mensaxe na rede social X.

Un presidente digno de su país debería estar con el jefe del Estado en un día como el de hoy, el de la Pascua Militar, en el que nuestro Ejército ha recibido un nuevo desplante por parte del máximo representante del Ejecutivo.

España merece una persona al frente del Gobierno a… pic.twitter.com/6Jpg2jIW7Y

— Alberto Núñez Feijóo (@NunezFeijoo) January 6, 2026

"España merece unha persoa á fronte do Goberno á altura dos profesionais que defenden a seguridade de todos os cidadáns desde as Forzas Armadas. E teraa", agregou.

Sánchez viaxou este martes a París para participar nunha nova reunión da Coalición de Voluntarios para Ucraína, unha cita convocada polo presidente francés, Emmanuel Macron, para consolidar o apoio a Kiev, no medio da conmoción internacional polo ataque dos Estados Unidos en Venezuela.

Pascua en Galicia

En Galicia o acto central da Pascua militar foi en Coruña. Alfonso Rueda e Diego Calvo asistiron á celebración na que se puxo en valor o labor das forzas armadas en traxedias como a DINA ou os incendios e tamén durante o apagamento. Ademais reivindicouse a necesidade dunhas forzas profesionalizadas ante un escenario internacional incerto.