Os países ameazados por Trump sinalan a "perigosa espiral" que supoñen os aranceis

Os oito países europeos e da OTAN que enviaron tropas a Groenlandia expresaron este domingo a súa "plena solidariedade" con Dinamarca ante os plans de anexión de Groenlandia por parte de EE.UU e sinalaron que a operación militar "non supón ningunha ameaza para ninguén", despois de que o presidente Donald Trump, ameazase con impoñerlles aranceis.

"Como membros da OTAN, estamos comprometidos co fortalecemento da seguridade do Ártico como interese transatlántico compartido.O exercicio danés «Arctic Endurance», coordinado previamente e levado a cabo cos aliados, responde a esta necesidade. Non supón ningunha ameaza para ninguén", dixeron nun comunicado conxunto Dinamarca, Finlandia, Francia, Alemaña, os Países Baixos, Noruega, Suecia e o Reino Unido.

"Solidarizámonos plenamente co Reino de Dinamarca e o pobo de Groenlandia. Sobre a base do proceso iniciado a semana pasada, estamos dispostos a establecer un diálogo baseado nos principios de soberanía e integridade territorial, que defendemos firmemente", engadiron.

Así mesmo, os asinantes defenderon que seguirán respondendo "de forma unida e coordinada" e "comprometidos coa defensa da súa soberanía".

Tal e como apuntaron este sábado os presidentes da Comisión Europea, Ursula von der Leyen, e do Consello Europeo, António Costa, os países tamén insistiron en que "as ameazas arancelarias socavan as relacións transatlánticas e entrañan o risco dunha perigosa espiral descendente".

Os embaixadores dos Estados membros da Unión Europea están a manter unha reunión extraordinaria sobre o asunto, mentres o bloque comunitario prepara os próximos pasos na súa resposta conxunta aos aranceis.

Trump anunciou o sábado que ía impoñer, a partir do 1 de febreiro, un arancel do 10 % a todos os produtos de oito países europeos que mandaron tropas a Groenlandia, e engadiu que subirá os aranceis ata un 25 % en xuño e que estes se manterán en vigor ata que se peche un acordo "para a compra total e plena de Groenlandia" por parte de Washington. 

Os soldados alemáns abandonan Groenlandia

Un equipo de 15 soldados alemáns abandonou Groenlandia este domingo en dirección a Copenhague tras cumprir coa súa misión exploratoria, segundo explicaron fontes do comando a varios medios de comunicación.

"A exploración termina como estaba planeada e agora analizaranse os resultados en Alemaña", dixo o xefe do comando que insistiu en que a misión non foi interrompida.

O equipo alemán chegou a Groenlandia o sábado pola noite e, segundo o Ministerio de Defensa, a súa misión era explorar que achega podía facer Alemaña para mellorar a misión da illa e do Ártico en xeral no marco da OTAN.

Macron pedirá á UE que active o instrumento anticoerción

Emmanuel Macron, pedirá á UE que active o instrumento anticoerción europeo polas ameazas de aranceis do líder estadounidense, Donald Trump, informaron este domingo os medios franceses, citando fontes próximas ao Elíseo.

Este mecanismo que data de finais de 2023 abriría a porta á UE para aplicar contra Washington unha ampla gama de sancións, entre elas a imposición de tarifas aduaneiras a produtos dese país, así como restricións no acceso a licitacións públicas europeas.

Europa Press / Alexis Sciard

Meloni tacha de "erro" aumentar aranceis

A primeira ministra italiana, Giorgia Meloni, considerou este domingo que é "un erro" o posible aumento de aranceis contra aqueles países europeos que decidiron mandar soldados para a seguridade de Groenlandia que anunciou Donald Trump.

"É un erro, e obviamente non estou de acordo con iso", dixo Meloni aos xornalistas durante a súa visita a Seúl.

Explicou que se comunicou con Trump para expresarlle a súa opinión e co Secretario Xeral da OTAN.

"Tamén falarei cos líderes europeos, pero creo que é moi importante dialogar entre nós e evitar unha escalada", engadiu a mandataria.

Segundo Meloni, produciuse "un problema de comprensión e comunicación" ao redor da iniciativa dos países da UE, que non debe interpretarse desde unha perspectiva "antiamericana".