Os pactos entre PP e Vox e a economía seguen a centrar o debate entre o PSOE e o PP
Os pactos entre PP e Vox e a economía seguen a centrar o debate entre o PSOE e o PP
A voceira socialista, Pilar Alegría, sostén que o PP e Vox asinan pactos "desde a escuridade" e insta a Feijóo a aclarar o seu sobresoldo
O líder do PP critica que o Goberno diga que "a economía vai como unha moto" mentres España acapara varios récords negativos
Breve comparecencia informativa da voceira socialista, Pilar Alegría, pero cun amplo abano de temas. Enviou unha mensaxe de solidariedade co Orgullo Gay e dixo que a tolerancia está sendo secuestrada nos edificios públicos polos pactos entre PP e Vox.
Cualificou eses acordos en Estremadura de "esperpento esmagador" e deixou toda unha batería de críticas para Feijóo, cuestionando algunhas das súas afirmacións.
"É verdade que cando un escoita a Feijóo axiña te dás de conta de que o mesmo lle dá 'atún que betún', depende do día e depende do momento e, sobre todo, depende do que lle conveña a el. Onde quedou aquilo de que goberne a lista máis votada?".
Núñez Feijóo falou hoxe de propostas para o sector agrario en Gimenells, o único concello de Lleida no que o PP ten maioría absoluta. Alí asegurou que a xente do campo perdeu un 11 % de renda nesta lexislatura mentres o Goberno di que "a economía vai como unha moto".
"A economía española vai coma unha moto e resulta que somos o segundo país que menos creceu da Unión Europea desde o ano 2019, o primeiro país en paro, o primeiro país en paro xuvenil, o segundo país en paro feminino, o país que máis incrementou a súa débeda e o déficit".
Entre outras medidas para o sector agrario, propuxo unha baixada impositiva, a revisión da PAC, programas de modernización e axuda, e falou tamén da necesidade de investir 40.000 millóns de euros en políticas hidrolóxicas.
