Publicador de contidos

Publicador de contidos

O rei Xoán Carlos chegará este xoves a Sanxenxo e o luns irá á Zarzuela

O rei Xoán Carlos chegará este xoves a Sanxenxo e o luns irá á Zarzuela

A Casa Real aclara que a visita se encadra "no desexo da súa maxestade o rei Don Xoán Carlos de desprazarse con frecuencia a España para visitar a familia e amigos"

G24.gal 18/05/2022 21:33

O rei Xoán Carlos chegará este xoves a España e permanecerá ata o luns, cando se verá no Palacio da Zarzuela con Filipe VI, a raíña Sofía e os demais membros da súa familia antes de volver a Abu Dhabi, polo que non pernoitará na que foi a súa residencia durante máis de medio século, informa a Casa do Rei nun comunicado.

O monarca emérito viaxará primeiro a Sanxenxo para asistir ás regatas, onde se aloxará no domicilio do seu amigo Pedro Campos, e o luns irá a Madrid, desde onde volverá a Abu Dhabi unha vez que se vexa co seu fillo e demais familiares sen pernoitar na Zarzuela.

O regreso despois de case dous anos de estadía en Abu Dhabi enmárcase no desexo de don Xoán Carlos de "desprazarse con frecuencia a España para visitar a familia e amigos e organizar a súa vida persoal e o seu lugar de residencia en ámbitos de carácter privado", como xa expresou na carta que dirixiu a Filipe VI o pasado 5 de marzo para comunicarlle o seu desexo de retornar, engade o comunicado de tres parágrafos.

Na nota, asegúrase que o encontro na Zarzuela será co "Rei, coa Raíña Sofía e demais membros da súa familia", sen concretar todas as persoas que formarán parte do encontro.

O feito de que don Xoán Carlos se desprace a Madrid o luns para manter a reunión familiar e ese mesmo día tome o avión de volta a Emiratos Árabes Unidos corrobora que non pernoitará na Zarzuela e só o fará na casa de Campos.

A Casa do Rei informou sobre os plans do emérito unha vez que este lle "trasladou esta tarde o seu desexo de que se faga pública a súa decisión" de volver a España desde mañá e ata o luns, cando regresará a Abu Dhabi, onde, lembran, "fixou a súa residencia de forma permanente e estable".

Filipe VI foi quen adiantou que se vería co seu pai tras falar con el por teléfono o pasado domingo durante a súa breve estadía en Abu Dhabi para mostrar as súas condolencias pola morte do anterior xefe de Estado de Emiratos.

A Casa Real xustificou o que pai e fillo non se visen en persoa en que “as características da cerimonia” fúnebre non o facían posible.

Ao día seguinte da conversación telefónica, foi o xornalista Fernando Ónega, amigo de don Xoán Carlos, quen desvelou o regreso, que consistiría nunha viaxe breve con parada en Sanxenxo e tamén en Madrid.

O alcalde do municipio pontevedrés, Telmo Martín, confirmouno o martes e enmarcou a visita na regata preparatoria do Mundial da clase 6 m que acollerá dentro dun mes, un título que don Xoán Carlos conquistou nas dúas últimas edicións co “Bribón”.

"Nós estamos encantados de poder demostrarlle o agarimo que sentimos por el despois de case dous anos de ausencia", dixo Martín.

O regreso a España do anterior xefe do Estado achandouse unha vez que a Fiscalía do Tribunal Supremo decidiu o pasado 2 de marzo arquivar as investigacións sobre os seus presuntos negocios irregulares no estranxeiro.

O rebumbio que provocaron as informacións sobre como xestionou diñeiro ás costas do fisco levou a don Xoán Carlos a trasladarse a vivir de maneira temporal a Abu Dhabi.

Tras a decisión dos fiscais de pechar o caso, don Xoán Carlos comunicou por carta a Filipe VI poucos días despois o seu desexo de regresar a España.

Publicidade
Publicidade
Publicidade