O PP esixe a dimisión de Inés Rey e Lage Tuñas tras as denuncias de acoso laboral

O portavoz do grupo municipal do PP no Concello da Coruña, Miguel Lorenzo, esixiu a dimisión da alcaldesa da Coruña, a socialista Inés Rey, e do portavoz do Goberno local e concelleiro de Facenda, José Lage Tuñas, tras as denuncias de acoso laboral por parte de dúas exconcelleiras do seu mesmo partido.

"Teñen que dimitir hoxe mesmo e se non o fan, ten que tomar unha posición o secretario xeral do PSdeG", dixo nunha comparecencia ante os medios de comunicación, en referencia a José Ramón Gómez Besteiro, ao que pediu que actúe neste caso como no do alcalde de Barbadás, Xosé Valcárcel, ao que pediu que deixase a Alcaldía tras a denuncia por presunto acoso laboral.

Lorenzo insistiu en que a rexedora non ten que remitirse a un comunicado, senón dar "explicacións", e considerou que a cidade non pode ter á fronte da alcaldía unha persoa "denunciada por acoso".

Ademais, instou o BNG a exercer "as súas competencias" en caso de que a alcaldesa herculina e o portavoz local non presenten a dimisión para que "os deixe de apoiar", engadiu en relación ao acordo de investidura.

"Feitos gravísimos"

De "feitos gravísimos" cualificou as denuncias efectuadas polas dúas exedís, das que, por outra banda, asegurou que era "un segredo a voces" a situación denunciada. En concreto, dúas exconcelleiras do Concello da Coruña, Eva Martínez e Esther Fontán, denunciaron por suposto acoso laboral á alcaldesa, Inés Rey, e ao seu número dous no Consistorio herculino, o responsable de Facenda, José Manuel Lage, mediante a canle interna do PSOE. Unhas denuncias ás que respondeu a través dun comunicado remitido aos medios a propia rexedora, que asegurou que se trata dun "axuste de contas" das exedís por non repetir nas listas.

Consultada por Europa Press, unha das denunciantes, a que foi tamén secretaria local do PSOE coruñés, Eva Martínez Acón, confirmou a denuncia, presentada a través da canle interna antiacoso do PSOE sobre uns feitos que relata que ocorreron no ano 2020.