O prezo do petróleo e do gas dispáranse tras os ataques a instalacións enerxéticas no golfo Pérsico

O barril de petróleo brent para entrega en maio dispárase case un 10% este xoves, ata situarse nos 117 dólares, ante o aumento das tensións en Oriente Medio tras os ataques producidos a instalacións gasísticas e petroleiras.

Ao comezo da xornada deste xoves, o prezo do cru brent, o de referencia en Europa, subía ata os 113 dólares. A suba non se detivo e inslaouse no entorno dos 117 dólares. Mentres, a cotización do Texas avanzaba máis do 3 %, ata os 99 dólares.

O prezo do gas natural para entrega a un mes no mercado TTF dos Países Baixos, de referencia en Europa, dispárase este xoves case un 30%, ata superar os 70 euros por megawatt hora (MWh).

Ás 8:15 horas, o gas natural avanzaba o 28,06 %, ata os 70,20 euros por megawatt hora (MWh), aínda que na apertura chegou a subir con máis forza e alcanzou os 72 euros.

O prezo do cru xa subiu con forza na véspera tras os recentes ataques de Israel e os Estados Unidos a instalacións gasísticas iranianas, entre elas o campo de gas natural Pars Sur no golfo pérsico de Irán.

Irán respondeu con ataques en Catar e os Emiratos Árabes Unidos a ese ataque por parte de Israel, do que o presidente dos Estados Unidos, Donald Trump, asegurou que non tiña coñecemento.

"Israel, enfurecido polo ocorrido en Oriente Medio, atacou unha importante instalación en Irán coñecida como o campo de gas South Pars. Só unha pequena parte resultou danada", dixo Trump nunha publicación na que se desliga do ataque.

Trump insistiu en que o seu país non tiña "coñecemento previo do ataque" e que "Irán, sen coñecer os feitos, respondeu atacando inxustificadamente unha parte da planta de gas natural licuado de Catar."

"Israel non volverá atacar o campo de gas Pars Sur, de vital importancia, a menos que Irán decida imprudentemente atacar a un país inocente, neste caso Catar", engadiu.

Pero tamén advertiu de que autorizará destruír o campo de Pars Sur en Irán, se este se atreve a atacar as refinerías de Catar novamente. 

Catar e Arabia Saudita denuncian novos ataques

Catar volveu denunciar na madrugada do xoves ataques iranianos contra parte da súa infraestrutura enerxética, despois de que o mércores rexistrase un impacto que xerou un incendio na refinería de Nivel Laffan, a principal de gas natural licuado do país.

Arabia Saudita dixo este xoves que dúas das súas refinerías en Riad foron atacadas, segundo a cadea Al Jazeera, mentres o ministro de Asuntos Exteriores saudita, o príncipe Faisal bin Farhan Al Saud, afirmou que o país se reserva o dereito de emprender accións militases contra Irán se fose necesario.

Irán ameaza con destruír o sector enerxético do golfo

Mentres, a Garda Revolucionaria iraniana asegurou este xoves que seguirá atacando a infraestrutura enerxética dos aliados dos Estados Unidos no golfo Pérsico ata a súa "completa destrución", se se repiten os ataques contra instalacións de Irán.

"Advertímoslles unha vez máis que cometeron un grave erro ao atacar a infraestrutura enerxética da República Islámica. Se isto se repite, non cesaremos nos ataques contra a súa infraestrutura enerxética e a dos seus aliados ata a súa completa destrución", advertiu nun comunicado publicado pola axencia Fars.

O estreito de Ormuz segue bloqueado

A axencia británica de Operacións Comerciais Marítimas (UKMTO polas súas siglas en inglés), que monitorea a seguridade de barcos e mariñeiros ao redor do mundo, alertou este xoves dun novo ataque contra un buque cisterna cerca do estreito de Ormuz, ao este de a costa dos Emiratos Árabes Unidos.

Desde o 28 de febreiro, cando empezou a ofensiva contra Teherán, a UKMTO rexistrou 20 incidentes en barcos ao redor do estreito.