O Lugo pecha o ano cunha vitoria importante diante do Granada (1-0)
Miguel Loureiro marcou o único gol na primeira metade
Antes do descanso foi expulsado Rubio, do Granada
O Lugo sumou unha vitoria balsámica diante do Granada, nun partido que axiña se puxo de cara. Miguel Loureiro marcaba o gol que sería definitivo no minuto 12.
O Granada, que aspira ao ascenso, viuse superado neste treito do encontro e, cando intentaba facerse co control do partido, quedou en inferioridade. Foi nunha acción que significou o segundo cartón amarelo para Rubio, aínda antes do descanso.
Cun xogador máis, o Lugo non se atopou cómodo, e tardou moitos minutos da segunda metade en comezar a crear perigo. Tiveron os de Fran Justo as súas opcións no cuarto de hora final, pero non concretaron ningunha e acabaron sufrindo. Nos minutos do engadido o Granada buscou o gol de todos os xeitos. Pero os lugueses souberon sufrir, e acabaron sumando unha vitoria mínima, pero moi importante. O Lugo marcha á parada da Liga con tres puntos que suman 21 na primeira volta. Terán que confirmar a mellora á volta do Nadal.
