O investimento estranxeiro en 2023 en España e Galicia, por María Loureiro

O investimento estranxeiro en España experimentou unha traxectoria irregular nos últimos anos. En 2022 alcanzou un récord histórico, alcanzando a segunda maior cifra rexistrada desde 1993, con máis de 34.178 millóns de euros. Con todo, o ano 2023 caracterizouse por unha forte caída preto do 20 % (19,7%). O investimento estranxeiro situouse en 28.215 millóns de euros, a cifra máis baixa desde 2020. As razóns fundamentais obedecen á incerteza económica global, guerra en Ucraína e inflación. Por países, Estados Unidos foi o primeiro emisor de fluxos de investimento a España (28,9 %), seguido por Reino Unido (13,1 %), Alemaña (10,6 %) e Francia (9,2 %). Por sectores, o 54,3 % do total do investimento estranxeiro en España dirixiuse ao sector servizos, o 42,2 % ao sector industrial e o 3 % á construción, destacando en subsectores o investimento no comercio ao por maior, as telecomunicacións, a enerxía eléctrica e combustibles.

Os datos de 2024, preliminares para este primeiro trimestre, demostran un lixeiro aumento do 3,7 % con respecto ao mesmo período do ano pasado. E existe un dato interesante: rexístrase un aumento do 12 % no investimento destinado a aumentar a capacidade produtiva e o emprego. Este ano 2024 está marcado de novo pola incerteza global, xa que o investimento estranxeiro en España dependerá da evolución da economía global e do contexto xeopolítico.

Galicia aínda segue moito menos exposta aos investimentos de capital por países terceiros. Nin o 1% do capital que entrou en España chegou a Galica. A súa evolución en Galicia adoita ser moi irregular. O investimento estranxeiro en Galicia experimentou unha traxectoria similar ao do conxunto de España nos últimos anos. En 2022 aumento do 11,5 %, alcanzándose unha cifra de 223 millóns de euros, sendo Portugal o maior investidor, cun 30 % do total. Os sectores principais son a industria (42 %), servizos (36 %) e enerxía (16 %).

O 2023 foi un ano sorprendentemente bo, pero con altibaixos. A pesar de que a inxección de xaneiro a setembro roldou os 100 millóns de euros, un 33 % menos que no mesmo período do exercicio anterior, o ano terminou de forma moi positiva. O forte aumento do último trimestre elevou a partida final ata os 416 millóns de euros, unha alza do 132 % respecto a 2022, segundo o balance actualizado onte polo Ministerio de Industria, Comercio e Turismo. Deles, ao redor de 269 millóns inxectáronse no sector da fabricación de produtos básicos de ferro, aceiro e ferroaleación, vinculados á compra das dúas factorías e as hidroeléctricas de Xallas Electricidade e Aliaxes (Xeal) en Cee e Dumbría por parte da compañía checa Energo-Prol. O investimento estranxeiro en actividades de produción doutros metais non férreos alcanza os 19,4 millóns de euros.

Os primeiros datos para 2024 son positivos con respecto ao ano previo, cun aumento de investimentos estranxeiros que rolda o 14 % con respecto ao ano anterior. Os sectores máis relevantes son os seguintes:

Industria da automoción: Stellantis anunciou un investimento de 500 millóns de euros na súa planta de Vigo para producir vehículos eléctricos. 

Alimentación: A empresa láctea Leite Río investiu 40 millóns de euros na ampliación da súa fábrica en Lugo.

O sector servizos tamén mostra moito dinamismo, particularmente o turístico e o de tecnoloxías da información e a comunicación (TIC): A empresa tecnolóxica Everis abriu un novo centro de traballo na Coruña.

Enerxía: Este é un ámbito moi prometedor, onde emerxen proxectos na eólica mariña, con investimentos en varios proxectos eólicos mariños, como o de Greenalia en Fisterra e o de Iberdrola na Mariña. Ademais tamén se aposta polo hidróxeno verde: Están a desenvolverse proxectos de produción de hidróxeno verde en Galicia, como o de Reganosa en Mugardos.

En resumo, cabe destacar que o investimento estranxeiro en Galicia en 2024 concéntrase polo de agora nun número reducido de proxectos de grande envergadura. E os sectores que recibiron máis investimento estranxeiro son aqueles que teñen un maior potencial de crecemento en Galicia. En termos de oportunidades, Galicia segue sendo un destino atractivo para o investimento estranxeiro polas súas infraestruturas, man de obra cualificada e especialmente as oportunidades comerciais que poidan xurdir en sectores estratéxicos como o eólico mariño, a biotecnoloxía ou a automoción.