O Goberno manterá a rebaixa do IVE aos carburantes malia o aviso de Bruxelas

O Goberno manterá a rebaixa do 10 % no IVE sobre os carburantes como medida "temporal" para facer fronte á carestía da enerxía como consecuencia da inestabilidade en Oriente Próximo, a pesar do aviso remitido por carta pola Comisión Europea de que esta rebaixa choca coas regras da Unión Europea.

"O Goberno mantén un diálogo construtivo e fluído coa Comisión Europea", indicaron fontes do Ministerio de Facenda. Desde o Executivo subliñan que a medida é "temporal e non estrutural" e manterase ata a data prevista, o próximo 30 de xuño.

O Executivo comunitario enviou unha carta ás autoridades españolas o pasado sábado 28 de marzo para advertir o Goberno de que a directiva europea sobre IVE "non contempla a posibilidade de aplicar un tipo reducido á subministración de combustible", explicou a portavoz comunitaria de fiscalidade, Louise Bogey.

A comunicación ao Goberno, que supón unha primeira toma de contacto oficial de Bruxelas sobre o asunto pero non o inicio dun expediente, si apuntaba outras alternativas compatibles coa lexislación comunitaria á hora de responder á subida de prezos da enerxía como son os impostos especiais sobre os carburantes.

Neste contexto, desde Facenda insisten en que o Goberno mantén un diálogo "fluído" coa Comisión Europea, pero defenden a viabilidade da medida en tanto que é unha resposta "temporal".

"A prioridade do Gobierno é e será apoiar a familias, autónomos e empresas a mitigar os efectos dun conflito bélico que xamais debería empezar", recalcan as fontes ministeriais.