O euríbor baixa en abril e abarata as hipotecas por primeira vez en dous anos

O euríbor a doce meses, o indicador máis utilizado para calcular as hipotecas variables en España, pecha abril á baixa, cunha taxa media do 3,703 %, e abarata por primeira vez en máis de dous anos as cotas destes créditos que se revisen anualmente.

O euríbor remata abril no 3,703 %, unha taxa menor que o 3,718 % que marcou en marzo, cando subiu tras dous meses de descensos. Así mesmo, rexistra o seu primeiro retroceso en taxa interanual, xa que hai un ano, en abril de 2023, situouse no 3,757 %.

Como consecuencia, aqueles que revisen a súa hipoteca variable de forma anual beneficiaranse dunha rebaixa nas cotas, e farano por primeira vez desde xaneiro de 2022. No caso dunha hipoteca media de 150.000 euros, a 25 anos e uns xuros do 1 % mais o euríbor, a rebaixa será duns 4,6 euros ao mes, ou case 56 euros ao ano.