O Deportivo mira cara a Abegondo e rexuvenece o cadro de xogadores
O cadro coruñés muda a estratexia no mercado de inverno e aposta pola xuventude
Iano e Mella pasan a ter ficha do primeiro equipo
Puerto, Alcaina e Quintero completan as incorporacións
No mercado do verán chegaron moitos xogadores con moita experiencia e quilómetros no fútbol profesional. Balenziaga, Salva Sevilla, Paris Adot, Ximo Navarro, José Ángel... Todos por riba dos trinta anos, viñan de xogar en categorías superiores. Non funcionou a estratexia, e o Deportivo cambiouna de xeito radical no mercado de inverno.
Liberou unha ficha de maiores de 23 anos (Mackay) para traer o prometedor porteiro Eric Puerto. Faltaba gol e Alcaina e Quintero son apostas para o ataque, pero de xogadores novos e con fame.
E despois do bo rendemento que deron os xogadores da canteira, encargados de darlle vida ao equipo no intre máis complicado da temporada, Fernando Soriano dálle dorsal de primeiro equipo ao lateral esquerdo Iano (Retuerta foise ao Hércules) e a David Mella.
