O Coruxo cae eliminado da loita polo ascenso cun empate diante do At. Baleares (1-1)
Os galegos acariñaron a vitoria nun campo moi difícil, pero acabaron igualando os illeiros en superioridade numérica
A eliminatoria, cun global de 4-1, remata unha moi meritoria temporada do Coruxo
Rematou a temporada do Coruxo, que caeu eliminado na primeira rolda polo ascenso nunha eliminatoria que chegaba xa case sentenzada ao Estadio Balear despois do 0-3 da ida. Na volta a historia foi ben diferente, e o Coruxo acariñou a vitoria, pero acabou empatando cun xogador menos. Un digno remate para unha gran temporada.
O Coruxo sabía que tiña que marcar axiña para meterse na eliminatoria. E protagonizou os primeiros achegamentos, nos que houbo polémica. Un despexe coa man de Lachevre pedido polos galegos non foi xulgado como penalti, e tampouco unha caída de Sola na área logo dun centro de Gandarillas.
O Atlético Baleares tamén tiña as súas accións. Un remate de Moha que non atopou portería, e outro de Iván López á saída dun córner logo de que o balón quedase morto, tamén acabou fóra. Despois foi Tovar, o que facía a parede con Keita e remataba moi preto do pau dun Alberto que despois pechaba tódolos ocos para evitar o gol de Jofre.
Pasou o Coruxo eses malos momentos sen encaixar gol e, no treito final da primeira metade, tivo as súas. No minuto 40, Nacho Fariña e Guille Pinín intgentaban senllos remates, e acababa detendo Pablo García. Despois foi Gandarillas o que o intentou por dúas veces, unha ás mans do porteiro, e outra saía moi desviada.
Na segunda metade o Coruxo seguiu a buscar as súas opcións,e aproveitou un roubo de Añóñ, que asistiu a Gandarillas no 52 para que este anotase o primeiro dos tres tantos que precisaban os vigueses.
Adiantábase o Coruxo pero, xusto a seguir, quedaba con dez. Dous cartóns en apenas dous minutos levaban á caseta a Borja Marchante e cpomplicaban aínda máis a eliminatoria.
Aínda con dez seguiu buscando o gol o Coruxo, e Guille Pinín estivo preto á saída dun córner. Pero os locais atopaban os espazos, e Bover rematou desde a frontal lambendo o pau. No minuto 76, Alberto empregouse a fondo para salvar un man a man na frontal da área. Aínda fixo ALberto outra boa intervención diante de Jofre pero, no minuto 84, non puido evitar o empate. Foi nun balón roubado logo dun saque de banda, que definiu Miguelito cun disparo axustado desde a frontal.
Non puido gañar o partido o Coruxo, lastrado por esa expulsión, pero remata así unha gran temporada na que conseguiu loitar polo ascenso por segunda vez na súa historia.
