O Celta non ten constancia da sanción de Antiviolencia que propón o peche de Balaídos

O Celta non recibiu, polo momento, ningún tipo de notificación oficial por parte da Comisión Antiviolencia advertíndolle da proposta de peche do estadio de Balaídos e unha multa de 350.000 euros polas incidencias que constan nun informe sobre o partido contra o Raio Vallecano, correspondente á penúltima xornada da Liga.

Desde o club móstranse sorprendidos ante o contido dese informe e avisan que, cando chegue ás súas oficinas, estudarano con detemento ante a posibilidade de presentar as oportunas alegacións. A entidade celeste non comprende a elevada contía da sanción e moito menos a ameaza de peche durante tres meses do estadio.

Fontes do Celta explicaron que, nas actas daquela tarde, tanto na arbitral como na policial, non se recolleu ningún dos problemas que resalta Antiviolencia e que a xornada transcorreu con normalidade. Lembran que foi un partido especial e que, a pesar de ser declarado de alto risco, non houbo incidentes. Aquel 18 de maio celebráronse concertos e unha romaría nos exteriores do estadio que congregaron a miles de persoas.

Antiviolencia castiga ao Celta "por non establecer as necesarias medidas de control de acceso e permanencia de espectadores e impedir que se ocupasen as vías de evacuación da bancada Marcador Baixo, que estiveron colapsadas por seareiros durante todo o encontro". 

Tamén "por permitir que un empregado do club facilitase o acceso a numerosos afeccionados desde a bancada de Río Baixo á bancada de Marcador Baixo. Ademais permitiuse o acceso ao estadio dun grupo dunhas 36 persoas desde un portal de acceso de vehículos ao interior do estadio cara á bancada de animación, todo sen ningún tipo de control nin observación das condicións de acceso -sen entrada ou título válido e sen acceder polos tornos-".