O Celta iguala un rexistro negativo de hai 43 anos

Coa súa derrota ante o Elxe (2-1) no Martínez Valero, o Celta igualou un rexistro negativo que perduraba desde o curso 1982-1983, cando o equipo dirixido entón polo serbio Milorad Pavic foi incapaz de gañar nas sete primeiras xornadas de Liga. O equipo de Claudio Giráldez non celebra unha vitoria en partido oficial desde o pasado 24 de maio, cando derrotou ao Xetafe no Coliseum para certificar a súa clasificación para a liga Europa. Ambos os equipos volveron enfrontarse na xornada inaugural do presente curso, e o triunfo levoullo o equipo de José Bordalás.

Os seguintes cinco partidos do Celta acabaron co mesmo resultado: 1-1. E esta fin de semana chegou a segunda derrota celeste en Liga, a terceira no que vai de curso contando a do pasado xoves ante o Stuttgart alemán na competición continental.

O Celta da tempada 1982-1983, que acabou perdendo a máxima categoría, non gañou o seu primeiro partido ata a oitava xornada, cando dobregou o Salamanca por 2-0. Antes, encadeara cinco derrotas (Sevilla, Zaragoza, Málaga, Atlético de Madrid e Rácing) e dous empates (Espanyol e Sporting).

O peor inicio na historia do Celta marcouno na tempada 1956-1957 o conxunto dirixido polo arxentino Alejandro Scopelli, que comezou con catro empates en Balaídos e catro derrotas a domicilio. A súa primeira vitoria chegou na novena xornada #ante o Xaén (4-0).