No mellor dos escenarios, o Celta ingresaría uns 30 millóns de euros pola Liga Europa

O Celta xogará competición europea por décima vez na súa historia e só por participar na Liga Europa, o conxunto vigués ingresará un mínimo de 5 millóns na primeira fase de oito partidos: 4,3 millóns son fixos por disputala, ao que engadiría os ingresos por dereitos de televisión.

Ademais por cada punto conseguido ingresaría 150.000 euros, cantidade que se eleva a 450.000 en caso de vitoria. Se o Celta finaliza entre os oito mellores, sumaría un bonus de 600.000 euros, que quedaría na metade se se clasifica entre o noveno e o décimo sexto.

Se avanza rolda e o equipo alcanza os oitavos, ingresaría 1,75 millóns. Os cuartos cotizan 2,5 millóns e chegar a semifinais, 4,2. Culminar a competición europea clasificándose para a final suporíalle 7 millóns e conquistar o título ten un premio de 6 millóns, ademais de alcanzar praza para a Liga de Campións.

Así pois, no mellor dos escenarios, o cadro vigués podería ingresar arredor de 30 millóns de euros; no peor, un mínimo que rozaría os 5.