Máis de 600 estudantes e os seus familiares asisten en Brión á feira das profesións

Especialistas en imaxe persoal ou en produción sonora. Todo tipo de oficios, de xeitos de gañar a vida e dar saída á propia vocación reúnense en Brión na Feira das Profesións.

Desde os módulos de estética que serven para facer caracterización para cine, por exemplo, ata o traballo nas Forzas e Corpos de Seguridade ou os Servizos de Emerxencias. Hai quen prefire dedicarse á investigación en biomedicina ou á repostería.

Din que o futuro dos que hoxe estudan secundaria pasará pola tecnoloxía. Pero tamén as profesións máis analóxicas recuperan importancia. Este ano, por demanda dos alumnos, a feira gañou en propostas de artes e humanidades, desde a cantería ata a arqueoloxía, pasando polas belas artes ou a lingüística, disciplinas que defenden tamén o seu labor investigador e de creación de novas ferramentas.

Ata cincuenta opcións, coas súas diferentes especialidades, configuran unha ampla oferta para os profesionais do futuro, que se pode coñecer no polideportivo do IES de Brión.