Luís Menor: "O Goberno aínda non convocou as primeiras axudas polos incendios"

O presidente da Deputación de Ourense asegura que están traballando na reconstrución tra a vaga de lumes do pasado mes de agosto. Unha vaga, sinala, "absolutamente inusual e cunhas dimensións desproporcionadas".

Na entrevista dos domingos da Radio Galega, Luís  Menor explicou que máis do 10% da superficie da provincia está afectada. Máis aló do dano ambiental, engade, os lumes causaron estragos en vivendas e en negocios.

"En canto ao monte, a natureza en Galicia é moi agradecida e, coas chuvias, algúns puntos van recuperando un primeiro verdor e vaise atenuando ese negro que tiñamos en boa parte da provincia. Estamos traballando na reconstrución".

O titular do ente provincial lamentou que os afectados aínda non recibiran as axudas do Goberno central que serán dun máximo de 15.000 euros. Entrementres, engadiu, a Xunta non só as tramitou senón que xa as aboou.

"Estamos agardando a que se convoquen as primeiras axudas do Goberno central mentres que a Xunta non só as tramitou senón que pagou a aquelas persoas que reúnen todos os requisitos esixidos cantidades importantes que chegan ós 148.000 euros".

Luís Menor lamentou, nos micrófonos da Radio Galega, que estas axudas non queden exentas de tributación o que considera "un despropósito" e unha absoluta falta de sensibilidade". 

Pola contra, abondou, a Deputación de Ourense promoveu unha modificación de crédito por valor de seis millóns de euros na que se priorizaron as axudas aos concellos afectados polos lumes.

Porén, lamentou que as regras fiscais do Goberno limiten o gasto ata o punto de non poder botar man dos 18 millóns de remanente para atallar as consecuencias derivadas dos incendios.

"Tivemos que limitar as axudas da Deputación  a un máximo de 100.000 euros por concello cando poderiamos máis que duplicalas se as regras fiscais nolo permitiran".

O presidente da Deputación de Ourense cuestiona as queixas de concellos como Vilamartín de Valdeorras ou a Rúa en relación coa afectación nas captacións de auga por mor da cinza.

"É curioso que as queixas se centren en dous concellos e, fundamentalmente, en Vilamartín de Valdeorras. Arderon moitísimos concellos... Dende a Deputación axudamos a pesar de que Vilamartín non pertence ao Consorcio de Abastecemento de Augas de Valdeorras. É un problema que creo que, en boa medida, está controlado se ben hai unha afectación clara".

Despoboamento 

Na entrevista dos domingos da Radio Galega, o titular  da Deputación de Ourense  referiuse aos datos provisionais do Instituto Nacional de Estatística (INE) que apuntan a que a poboación da provincia aumentou en máis de mil persoas no primeiro semestre de 2025.

"As previsións demográficas que tiñamos eran terroríficas e non só non se cumpriron senón que se están revertendo. Estamos preto dos 306.000 habitantes e ese é un dato moi importante".

Luís Menor atribuíu estas cifras á chegada de moita poboación migrante.

"Os nacementos pasan  pouco dos mil ó ano e as defuncións chegan ás catro mil. A pesar diso gañamos poboación o que quere dicir que está a chegar moita poboación foránea".

Turismo

O presidente da Deputación de Ourense asegura que o turismo na provincia "está en alza".

Luís Menor admite que os  incendios repercutirán nas cifras finais de visitas e tamén os 10 días nos que se interrompeu o servizo de alta velocidade. Con todo, o responsable do ente provincial é optimista. Segundo afirmou, a chegada do AVE, hai catro anos, supuxo un revulsivo no turismo.

"Pola estación de Ourense pasan xa máis de dous millóns de persoas ó ano e hai moita xente que agora chega á cidade porque está a dúas horas e cuarto de Chamartín, de Madrid".

Para Luís Menor, os recursos turísticos cos que conta a provincia fan que cada vez cheguen máis visitantes.

"A Ribeira Sacra, o termalismo, o Camiño de Santiago coa Vía da Prata, a nosa gastronomía, os nosos viños. En definitiva, todos os recursos  que temos fan que cada vez teñamos máis turistas e hai un nicho importante de actividade económica, de creación de emprego e de posicionamento da provincia".

O titular da Deputación suliña que as conexións ferroviarias e os accesos terrestres por autovía remataron co illamento de Ourense e que isto "se nota no turismo".

Orzamentos 

O responsable provincial sinalou que os presupostos da Deputación para o ano que vén ascenden a 110 millóns de euros, un 5,5% máis.

Luís Menor referiuse ao novo sistema de financiamento dos concellos a través do Plan CooperOU, dotado con 19 millóns de euros.

Tamén asegurou que o ano que vén os investimentos na rede viaria provincial ascenderán a 10 millóns de euros.