Irán retoma os voos ao estranxeiro por primeira vez desde o inicio da guerra
O Aeroporto Imam Jomeiní de Teherán volveu activar as conexións internacionais no medio da tregua
Un panel informativo no aeroporto. Majid Asgaripour/WANA vía REUTERS
Irán restableceu este sábado os voos internacionais por primeira vez desde que Israel e os Estados Unidos lle declararon a guerra o pasado 28 de febreiro.
No medio do alto o fogo provisional acordado entre ambas as dúas potencias, o Aeroporto Internacional Imam Jomeiní de Teherán retomou as conexións co estranxeiro.
Os primeiros voos engalaron ao amencer con destino a cidades como Medina (Arabia Saudita), Mascate (Omán) e Istambul (Turquía), segundo informan medios locais.
As autoridades aseguran que esta nova fase operativa comezou con éxito grazas á coordinación das aeroliñas nacionais e adiantan que o ritmo de voos aumentará nos vindeiros días.
Este mércores, retomáronse os voos nacionais dende a capital persa á cidade nororiental de Mashad.
Unha pasaxeira no aeroporto de Teherán. Majid Asgaripour/WANA vía REUTERS
Cara á normalización
A reapertura do principal aeroporto internacional do país considérase un paso clave cara á normalización das operacións aéreas e a mobilidade de persoas.
Irán pechara o seu espazo aéreo co inicio da contenda, pero o sábado pasado anunciou a súa reapertura no leste do país no medio da tregua cos Estados Unidos.
Con todo, máis dunha vintena de naves e varias terminais quedaron danadas nos bombardeos. Segundo o subdirector da Aviación Civil, Hamidreza Sanaei, ao redor do 20% da flota iraniana de pasaxe atópase fóra de servizo.
