Hamas responde á proposta dos EUA pedindo a fin de guerra e a saída das tropas israelís

O grupo islamita Hamas asegurou este sábado que xa entregara a súa resposta á última proposta estadounidense de cesamento do fogo en Gaza, e que esta incluía emendas para lograr o final da guerra e o repregamento fóra da Franxa das forzas israelís.

A contraoferta presentada aos mediadores "busca lograr un cesamento do fogo permanente, unha retirada completa da Franxa de Gaza e garantir o fluxo de axuda ao noso pobo e ás nosas familias", anunciou Hamas nun comunicado, no que dixo estar disposto a liberar dez reféns vivos e 18 falecidos, como estaba acordado.

As peticións de Hamas non son novas, e con alta probabilidade van chocar frontalmente coas esixencias do Goberno do primeiro ministro israelí, Benjamín Netanyahu, quen se opón a dar por concluída a ofensiva militar e anunciou en marzo que Israel ocupará territorio en Gaza.

A resposta de Hamas prodúcese despois de que, este venres, 30 de maio, anunciara estar a consultar co resto de faccións palestinas en Gaza, como a Yihad Islámica, a última proposta do enviado dos EUA, Steve Witkoff, a fin de tomar unha decisión consensuada.

Segundo fontes con acceso ao pacto citadas pola prensa israelí, no novo documento non queda por escrito ningunha esixencia para que Israel poña fin definitivamente á ofensiva bélica ou retire as súas tropas da Franxa. Si inclúe a liberación de dez reféns vivos e 18 mortos en dúas quendas, a cambio dun cesamento do fogo de 60 días.

Hamas tamén estipula nunha linguaxe vaga a entrega inmediata de axuda humanitaria.

Explosións no norte da Franxa de Gaza, este sábado. Imaxe: Reuters

Netanyahu tacha de "inaceptable" a proposta de Hamas que pide emendas no alto ao lume e intensifica os ataques

O primeiro ministro israelí, Benjamín Netanyahu, cualificou este sábado de "inaceptable" a resposta de Hamás á última proposta estadounidense de cesamento do fogo, a cal pediu emendar a cambio de aceptar liberar a 10 reféns vivos e 18 mortos nun prazo de dúas semanas.

Como declarou o enviado especial do presidente de Estados Unidos para Oriente Medio, Steve Witkoff: 'A resposta de Hamás é inaceptable e atrasa a situación', dixo hoxe a Oficina de Netanyahu nun comunicado.

No texto, Netanyahu acusa a Hamas de manterse "firme na súa negativa", xa que o grupo islamita anunciou que para lograr un pacto debe haber garantías de que as tropas israelís abandonarán a Franxa, así como negociacións para un "cesamento do fogo permanente".

"Israel continuará as súas accións para o regreso dos nosos reféns e a derrota de Hamas", sentenciou o primeiro ministro.

O Exército israelí intensificou os ataques aéreos contra a cidade de Gaza e a gobernación Norte e, en só 48 horas, bombardeou 60 edificios residenciais nos que se refuxiaban "centos de familias", moitas das cales se quedaron sen casa, informou hoxe nun comunicado o portavoz da Defensa Civil.

Desde onte, venres, máis de 60 cadáveres de palestinos chegaron aos hospitais da Franxa, segundo datos do Ministerio de Sanidade, o que aumentou a cifra total de falecidos - en ataques directos, sen contar os que seguen baixo os entullos, mortos por enfermidade ou inanición - a preto de 54.400 desde o 7 de outubro de 2023.