Giráldez: "Non podemos conceder nin o segundo nin o terceiro gol"
O técnico celeste, con todo, destacou a reacción do seu equipo ao 0-1 porque “despois do 1-1 tivemos momentos moi bos en que non acertamos"
Claudio Giráldez, adestrador do Celta, sinalou que dúas accións defensivas “moi corrixibles” no segundo e terceiro gol do Barcelona condenaron o seu equipo ante o conxunto azulgrá.
“Non podemos conceder o segundo nin o terceiro gol. Iso é ao que me refería con estar perfectos. Estivemos moi ben en bloque baixo en moitos momentos, pero non nos pode rematar Lewandowski entre dous centrais nosos e non nos poden facer unha última acción en que o balón se pasea por diante con malas axudas por fóra. Son dúas accións moi corrixibles”, explicou.
O técnico celeste, con todo, destacou a reacción do seu equipo ao 0-1 porque “despois do 1-1 tivemos momentos moi bos en que non acertamos, situacións para min moi vantaxosas con eles pasándoo mal, incómodos no campo e perdendo moitos balóns”.
“Neses momentos tivemos moitas situacións de campo aberto para poder atacar, coa liña deles descoordinada. Aí estivo o momento do partido para nós”, explicou.
Giráldez, ademais, fixo autocrítica por non retirar antes o internacional español Óscar Mingueza.
"Non se estaba atopando ben. Tivo problemas gástricos antes do partido, e tiña que cambialo no minuto 40. Quixemos non gastar a ventá antes do descanso, e aí non se axustou ese corredor, Rashford fíxonos moito dano neses momentos finais do primeiro tempo”, sentenciou.
