Fomento rexeita a reforma da nacional 541 ao non estar entre as de alta concentración de accidentes

O alcalde de Cerdedo-Cotobade tiña pendente unha resposta do Goberno central sobre a súa petición dunha reforma integral da nacional 541. Jorge Cubela vailles pedir o apoio a todas as corporacións polas que pasa esta vía.

Mentres segue a investigación do accidente da Noiteboa, o Ministerio de Fomento informou nas últimas horas a Televisión de Galicia que esta estrada non se considera de alta concentración de accidentes e ningún dos seus treitos, incluídos os 28 kms que pasan por Cerdedo-Cotobade, ten sinistralidade superior á media estatal.

Engaden que o lugar do accidente é un treito recto con boa visibilidade no que realizaron obras de mellora da sinalización e balizamento en 2021 e 22 así como que non lles constan anteriores accidentes no lugar.

A veciñanza está en desacordo e, mentres lembran os accidentes máis próximos, achacan os problemas de seguridade, como os embalsamentos de auga, xustamente ás últimas obras na estrada.