Feijóo ábrese a pactar a política de Defensa; Sánchez terá máis difícil convencer a Unidas Podemos

O presidente do PP, Alberto Núñez Feijóo, mostrouse este xoves disposto a pactar unha política de Defensa e Seguridade pero reclamou ao Goberno que sexa "coherente" e formule unha proposta.

Feijóo foi preguntado polo posible apoio do PP á ampliación da presenza militar de Estados Unidos na base de Rota e pola ampliación do orzamento de Defensa ata chegar ao 2 % do PIB. O presidente popular manifestou que o seu partido sempre foi un "firme partidario" da OTAN e dunha relación bilateral "de confianza e amizade" cos Estados Unidos.

Asegurou que o Goberno pode "contar" co PP para unha política de Estado en Defensa, pero sinalou que o primeiro é que todo o Goberno sexa "coherente" nesta materia e formule unha proposta, á que o seu partido responderá con "seriedade".

Feijóo felicitou ao Goberno pola "imaxe positiva de organización" que deu España co cumio da OTAN en Madrid, cuxa celebración lembrou que se "conseguiu" cando Mariano Rajoy era presidente.

Belarra non ve máis gasto militar

A ministra de Dereitos Sociais e secretaria xeral de Podemos, Ione Belarra, non ve prioritario aumentar o gasto en Defensa nos próximos orzamentos xerais do Estado de 2023 e avisou ao Goberno de que os números no Congreso son "túzaros".

Desde o Congreso, Belarra asegurou que o aumento do gasto en Defensa "teríase que traducir nun acordo orzamentario" e apuntou que "a pregunta que hai que facerse é se se destina máis diñeiro ao investimento militar de onde sae ese diñeiro".

Ademais, non ve "unha decisión pertinente" o acordo con Estados Unidos para incrementar en dous o número de destrutores estadounidenses na base naval de Rota, porque o que necesita Europa é "é máis autonomía estratéxica" e "menos depender de intereses externos".

Belarra apuntou aspira a "convencer" ao PSOE e ao resto de socios de que España necesita "moito máis" unha renda garantida que "máis investimento en tanques ou en armas".