Os traballadores do sector forestal padecen a taxa de sinistralidade máis alta
Expertos avogan por unha normativa de prevención de riscos específica para estes traballos
Segundo datos do Instituto Nacional de Seguridade e Saúde, o sector forestal é o que rexistra a maior taxa de sinistralidade por accidente con baixa. Mesmo por enriba da construción e da industria.
Os expertos atribúeno a diversos factores. Á elevada temporalidade, á atomización das empresas ou á dispersión, súmanse os riscos dispares aos que se enfrontan nestes traballos.
Desde a propia maquinaria que usan ata o tipo de terreo, as condicións climatolóxicas ou o uso de produtos fitosanitarios. Para reducir esta sinistralidade, cren imprescindible que o sector conte cunha normativa específica, xa que rexe pola mesma que un bar ou unha tenda de roupa.
Outra das grandes carencias do sector é a falta de formación, especialmente os traballadores estranxeiros.
Os expertos avogan porque se aproveite o capital humano das facultades de enxeñería forestal galegas tanto para controlar os procedementos no monte como na formación.
As características da actividade forestal fan tamén difícil o traballo de inspección pola dispersión, a dificultade dos accesos e a gran mobilidade.
