En Culturgal o público pode coñecer os contidos de AGalega.gal e as novidades de CSAG

En Pontevedra continúa a celebrarse Culturgal, a Feira das Industrias Culturais Galegas, que se converte un ano máis no punto de encontro principal do sector.

En Culturgal, a Corporación de Servizos Audiovisuais de Galicia volve ter unha presenza destacada convidando a cativada a converterse por uns minutos en presentadores dun telexornal da TVG, lendo á cámara noticias e vendo o resultado na pantalla, achegando así a nosa televisión a todos os espectadores. No expositor pódense descubrir as plataformas dixitais AGalega.gal, Xabarin.gal e AGalegaAudio.gal. Ademais preséntanse outras novidades.

"Aproveitamos este marco para presentar dúas primicias moi importantes, que son, por un lado, a serie Pensión incompleta, serie de ficción nas catro linguas oficiais, é un experimento moi novidoso. Presentamos un novo programa que se chama Palmira Lará, que pretende preservar o patrimonio cultural a través do legado da tradición oral", di Montse Besada, xefa de contidos de CSAG.

Neste marco cultural xúntanse co audiovisual, a música, as artes escénicas e as plásticas.

"Para min a cultura non ten sentido sen esta peza fundamental que é a relación directa entre o lector ou espectador é o feito artístico", destaca Miguelanxo Prado, autor de cómic e ilustrador.

Non poden faltar tampouco espectáculos, mesas redondas... e a literatura, coa presenza durante estes tres días de autores recoñecidos.

"É unha mostra moi completa do que é a cultura en Galicia e en galego", di Nerea Pallares, escritora, premio de novela García Barros.

"Culturgal é unha marabilla porque é un espazo onde atopas ese punto de converxencia curioso entre literatura, cine, danza, música, que temos moito máis en común do que parece", engade a escritora María Nieto.

Público e creadores coinciden en que Culturgal contribúe un ano máis eadar visibilidade e estabilidade ao tecido cultural galego.