Trump confirma que aspira a ser candidato nas presidenciais de 2024
Trump confirma que aspira a ser candidato nas presidenciais de 2024
Trump abre así a carreira polo nomeamento republicano, na que por agora parece que habería outros dous posibles candidatos, Ron DeSantis e Mike Pence, antigos aliados seus
O expresidente dos EUA repite lema da súa anterior campaña electoral: Make America Great Again ("Fai que os Estados Unidos volvan ser grandes")
O expresidente dos EUA Donald Trump confirmou este martes que aspira a ser candidato nas eleccións presidenciais de 2024 e abriu así a carreira polo nomeamento republicano, na que por agora se albiscan outros dous posibles candidatos, Ron DeSantis e Mike Pence, antigos aliados seus.
Trump, de 76 anos, escolleu a opulencia da súa mansión de Florida Mar-a-Lago para facer un anuncio que viña insinuando desde hai meses e que chega nun momento en que a súa estrela política non é o que adoitaba ser e afronta problemas coa xustiza e o Congreso.
O "importante anuncio" que adiantou que ía facer este 15 de novembro resultou ser o que todos pensaban: por terceira vez competirá por ser candidato á Casa Branca.
Nun discurso de máis dunha hora que pronunciou ante a súa familia e un numeroso grupo de invitados, Trump centrouse en presentarse como o candidato que pode salvar os EUA dun desastre e devolverlle a "gloria" perdida. De feito, criticou a xestión de Joseph Biden, ao que acusou, entre outras moitas cousas, de "destruír a economía" estadounidense.
