Desarticulado un punto de venda de droga en Ourense co ingreso en prisión dun veciño do Couto

A Policía Nacional desarticulou un punto de venda de droga na cidade de Ourense coa detención dun veciño do barrio do Couto. O xulgado decretou o seu ingreso en prisión.

Nun comunicado, a Policía informa de que a investigación da operación Laundry se iniciou o pasado mes de xuño, froito dun dispositivo específico para a detección e desarticulación de puntos negros de venda de estupefacientes na cidade, así como da información obtida sobre tráfico de drogas nunha rúa do barrio do Couto.

Este individuo vendía a pequena escala drogas como cocaína e haxix. O agora detido quedaba cos compradores, unhas veces nas proximidades do seu domicilio e outras desprazándose en vehículo a diversos lugares da cidade.

O operativo policial de detención tivo lugar o pasado 14 de setembro por un suposto delito contra a saúde pública. Levouse a cabo un rexistro na vivenda do home, onde se comisaron 500 gramos de cocaína, máis de 8 quilos de haxix, uns 70.000 euros en diñeiro en efectivo, dous vehículos de alta gama e outros efectos relacionados coa distribución e a pesada de drogas como básculas de precisión.

Tras realizar as dilixencias oportunas o detido foi posto ao dispor do Tribunal Instancia Sección de Instrución Praza número 1 de Ourense, que decretou o seu ingreso en prisión.