Claudio Giráldez substitúe a Rafa Benítez no Celta
O ata o de agora técnico do filial debutará o vindeiro domingo no Sánchez Pizjuán ante o Sevilla
Claudio Giráldez, adestrador da Celta Fortuna, será o substituto de Rafa Benítez no primeiro equipo. Coa peor porcentaxe de vitorias dos últimos 80 anos e unicamente dous puntos de vantaxe sobre a zona de descenso, Rafa Benítez foi destituído a falta de dez xornadas para o final da Liga a pesar de que aínda lle restaban dous anos e medio de contrato.
Marian Mouriño, que asumiu a presidencia a finais do pasado ano aínda que xa viña exercendo desde o principio do curso, aposta por un home da casa: Claudio Giráldez.
O ata o de agora técnico do filial, ao que mantén na pelexa polo ascenso directo a Segunda División e co que disputou dúas fases de ascenso á categoría de prata, debutará co Celta o vindeiro domingo no Sánchez Pizjuán.
𝗢𝗙𝗜𝗖𝗜𝗔𝗟 📣 Claudio Giráldez é o novo adestrador do primeiro equipo. Moita sorte, míster! 🩵
— RC Celta (@RCCelta) March 12, 2024
O adestrador porriñés saltou desde o Celta Xuvenil de División de Honra ao filial na campaña 2022/2023, na que, cun equipo dunha enorme mocidade, logrou a clasificación para o playoff de ascenso.
Na actual campaña, e tras 27 xornadas disputadas, o Celta Fortuna é quinto con 47 puntos.
O adestrador do Celta C – Gran Peña, Fredi Álvarez, substituirá a Giráldez no filial céltico.
