Cinco detidos polo roubo de máis de 70 cabalos na serra do Barbanza

Efectivos da Garda Civil de Boiro, no marco da operación Besteiros, detiveron cinco homes polo roubo de máis de 70 cabalos en diversas zonas de pasto situadas na serra do Barbanza.

Aos implicados atribúeselles a presunta autoría de delitos de furto e maltrato animal con resultado de lesións graves e morte.

Segundo se describiu durante a investigación, o grupo actuaba de forma coordinada subtraendo reses que posteriormente eran vendidas a membros dunha asociación gandeira.

Para dificultar a identificación dos animais polos seus lexítimos donos, os implicados modificaban os trazos identificativos nas orellas das reses.

Ademais, realizaban novas marcas sobre as orixinais e causaban lesións que carecían de calquera tipo de supervisión facultativa ou clínica veterinaria.

Durante o transcurso da investigación confirmouse a morte de cinco animais por impactos de arma de fogo, polo que tamén se procedeu á intervención de cinco escopetas de caza, presuntamente empregadas por un dos implicados para efectuar os disparos.

O operativo deuse por finalizado tras a devolución das reses aos seus propietarios de Boiro, Porto do Son e Lousame, e logrouse o total esclarecemento dos feitos denunciados.

Os cinco detidos foron postos en liberdade tras prestaren declaración nas dependencias oficiais da Garda Civil de Boiro, e as dilixencias instruídas foron remitidas ao Tribunal de Instancia de Garda de Ribeira.