Calendario electoral: da publicación da convocatoria á xornada dos comicios
A campaña comezará o venres 13 de novembro e durará ata o 27, para dar paso á xornada de reflexión
Arquivo (Europa Press/Carlos Castro)
O anuncio de eleccións xerais anticipadas para o 29 de novembro feito este luns polo presidente do Goberno, Pedro Sánchez, implica un calendario de prazos que se inicia este martes coa publicación do decreto correspondente no Boletín oficial do Estado.
Estas son as principais datas do proceso electoral que se abre a partir de agora:
Este martes 6 de outubro publicarase no Boletín Oficial do Estado (BOE) o decreto da convocatoria electoral, e o inicio do proceso para solicitar o voto por correo.
O 16 deste mes será o último día para que os partidos que vaian en coalición o poidan comunicar.
O 21 de outubro abre o prazo para a presentación de candidaturas, que finalizará o día 26. As candidaturas presentadas publicaranse no BOE o día 28.
O 30 de outubro é a data límite para que as Xuntas Electorais competentes comuniquen posibles irregularidades sobre candidaturas.
O 2 de novembro as Xuntas Electorais proclamarán os candidatos, que verán os seus nomes publicados un día despois no BOE coas candidaturas proclamadas.
Ata o día 5 poderán presentarse recursos respecto á proclamación de candidaturas ante o Xulgado do Contencioso-Administrativo, que teñen só dous días, ata o 7 de novembro, para resolvelos.
Deseguido, e se hai recursos sobre as candidaturas ante o Tribunal Constitucional, o día 9 será a data límite para a súa presentación.
Campaña electoral
O día 13 de novembro, comeza a campaña electoral ás 00:00.
O 19 será o último día para solicitar o voto por correo, aínda que esa data podería prorrogarse algún día, como xa ocorreu nalgún proceso electoral anterior.
O día 23, a seis días dos comicios, será o último no que se poidan publicar enquisas electorais.
O 25 de novembro será o último no que se poida exercer o voto por correo, data que tamén podería estenderse un día ou dous.
O día 27, ás 24:00 horas, finaliza a campaña electoral e éntrase na xornada de reflexión, que durará durante todo o día 28, sábado.
Domingo electoral
O día 29 de novembro, domingo, como acaba de anunciarse, será a xornada electoral.
O mesmo día das eleccións coñeceranse os resultados provisionais, e xa o día 2 as xuntas electorais iniciarán o escrutinio xeral dos votos coas actas do escrutinio da cada mesa.
A data de constitución das Cortes da XVI lexislatura, que deberá ser como máximo o 24 de decembro, día de Noiteboa (xa que a Constitución determina que non exceda os 25 días desde os comicios) quedará fixada no decreto de convocatoria das eleccións.
