Bustinduy anuncia que a lei de familias recollerá unha prestación por fillo de 100 euros

O ministro de Dereitos Sociais, Consumo e Axenda 2030, Pablo Bustinduy, anunciou que a lei de familias, actualmente en tramitación parlamentaria, vai formalizar unha prestación universal por crianza de 100 euros ao mes por fillo e filla durante os seus tres primeiros anos de vida.

Trátase só dun primeiro paso xa que o obxectivo é estender esa axuda ata os 18 anos, avanzou o ministro nun comunicado con motivo do Día Internacional das Familias. Paralelamente, Bustinduy vai negociar, xunto á vicepresidenta segunda e ministra de Traballo, Yolanda Díaz, a inclusión dunha prestación deste tipo de 200 euros ao mes nos próximos Orzamentos Xerais do Estado para 2025.

O ministro xustificou a medida en que España só destina un 1,5 % do PIB para infancia e familias fronte ao 2,4 % da media da Unión Europea e valorou que, ao ser universal, é máis efectiva para reducir a pobreza infantil tal e como apuntan os datos daqueles países que apostan pola universalidade como Alemaña, Austria, Holanda, Irlanda, Suecia e Polonia.

Bustinduy tamén defendera a efectividade da medida para loitar contra a baixa natalidade en España.

"Debátese moito sobre a situación demográfica, o feito de que as mulleres atrasan moito a idade para ter fillos e as inmensas dificultades que teñen no día a día, pois é hora de responder. E a mellor maneira é unha prestación universal por crianza porque é máis efectiva e chega mellor a todas partes", asegurou.

Segundo Bustinduy, esta nova axuda será un factor decisivo para garantir "unha certa igualdade de oportunidades no principio da vida" porque está demostrado -lembrou- que a pobreza se transmite de xeración en xeración e ten un impacto tremendo no desenvolvemento vital, a nivel educativo, profesional e de saúde.