Atacan cun artefacto explosivo a sede da UXT en Vigo
O representante estatal vinculou este suceso coa "violencia verbal" contra as organizacións sindicais, "a base de insultos certamente lamentables", nos días previos á folga xeral
UXT
Dúas persoas atacaron cun artefacto explosivo de escasa potencia a sede da UXT en Vigo, segundo informou este mércores o subdelegado do Goberno en Pontevedra, Alfonso Lago.
A deflagración fracturou o cristal da porta principal da sede, situada na avenida de García Barbón, e obrigou a mobilizar os especialistas do corpo dos TEDAX da Policía Nacional, que abriu unha investigación.
O representante estatal condenou rotundamente o ataque e vinculou este suceso coa "violencia verbal" contra as organizacións sindicais, "a base de insultos certamente lamentables", nos días previos á folga xeral.
Lago opinou que, "cando se din determinadas cousas, créase o ambiente que propicia accións tan intolerables como esta".
O subdelegado confiou na pronta identificación dos autores do ataque e en que respondan ante a Xustiza.
Por outra banda, valorou que a xornada de folga xeral transcorreu na provincia sen incidentes graves, á marxe da denuncia presentada pola mañá por un intento de atropelo a un membro do piquete informativo de CCOO no polígono pontevedrés do Campiño.
