Aspas e Seferovic volven traballar co grupo en Afouteza
Onte estiveron exercitándose en solitario no ximnasio
O dianteiro do Celta Iago Aspas volveu traballar este mércores cos seus compañeiros na Cidade Deportiva Afouteza tras non saltar ao céspede onte para realizar traballo de recuperación no ximnasio, confirma Efe.
O máximo goleador do equipo vigués tivo que ser substituído no inicio do segundo tempo do último partido contra o Valencia por unha lesión crónica nas costas que lle está dando problemas nas últimas xornadas.
A outra boa noticia para o adestrador portugués é que Haris Seferovic, autor do gol do seu equipo no duelo ante os valencianistas, superou as molestias no aductor que tamén o obrigaron a ser substituído e, en principio, non terá problemas para xogar en San Mamés.
Para o choque contra o Athletic, Carvalhal perde ao internacional peruano Renato Tapia, que cumprirá ciclo de tarxetas amarelas, pero recuperará aos defensas Javi Galán e Joseph Aidoo, cos que non contou ante o Valencia por sanción.
