A chuvia refrea a guerra en Ucraína pero as vítimas civís seguen aumentando
Os analistas vaticinan que o ritmo das operacións irá a máis nunhas semanas
A batalla refreou debido ás condicións climáticas. Os analistas do Instituto norteamericano de Estudos da Guerra din que a chuvia e a lama dificultan o avance das tropas.
Prognostican, porén, que o ritmo das operacións aumentará nas próximas semanas, cando baixen máis as temperaturas e o chan se conxele.
A prioridade actual para Rusia é tomar o que lle falta da rexión de Donetsk, pero a intelixencia británica ve difícil que dea concentrado os recursos necesarios para logralo.
Nos últimos días, o territorio apenas cambiou de mans, a pesar de que os combates alí seguen a ser os máis duros.
As dúas partes denunciaron vítimas civís este domingo. Cinco mortos e catro feridos en áreas controladas por Ucraína e tres mortos e tres feridos nas localidades prorrusas.
Rede eléctrica
Ucraína restableceu boa parte da rede eléctrica danada nos ataques masivos do mércores, que sumiron o país na escuridade. Con todo, Volodímir Zelenski pediulle á cidadanía que aforre enerxía.
Dixo que aínda hai arredor de millón e medio de usuarios con restricións en catorce rexións. Ademais, Moscova non deixa de atentar contra estas estruturas básicas.
