Alexia Putellas e Benzema gañan o Balón de Ouro
A xogadora do Barcelona repite galardón e o francés do Real Madrid ve premiada a súa magnífica temporada
Gavi, Courtois e Lewandowski tamén levan trofeos principais
Alexia Putellas, malia a grave lesión que sufriu xusto antes da Eurocopa, repetiu o título como mellor xogadora do mundo que acredita o Balón de Ouro. O outro gran premio individual da gala foi para o dianteiro francés do Real Madrid Karim Benzema, peza fundamental nos títulos de Liga e Champions.
Outros xogadores da Liga levaron galardóns principais. Un deles foi o centrocampista do Barcelona Gavi. O andaluz é considerado o mellor xogador novo do mundo. Courtois levou o Trofeo Yashin como mellor porteiro e Lewandowski gañou o de mellor dianteiro, aínda que os seus méritos principais foron coa camisola do Bayern de Múnic.
O Real Madrid non puido levar o pleno como mellor club do mundo neste 2022. O premiado foi o Manchester City, gañador da Premier, pero eliminado polo equipo madrileño nas semifinais da Champions.
