Un interno do cárcere da Lama golpea e ameaza varios funcionarios durante un motín

Unha lea entre tres internos rematou cun dos presos amotinado nunha biblioteca tras desobedecer as ordes dos funcionarios que tentaban separalos. Unha vez dentro ameazou e tentou agredir os traballadores deste cárcere da Lama.

"Tirándonos obxectos e tentando golpear a un funcionario cunha barra de ferro na cabeza. Grazas que puido esquivalo e non lle deu pero as súas intencións non eran boas. O xefe de servizo ordenou que os funcionarios pechasen o patio, levasen a xente ás celas e lles ordenou poñerse o casco e o escudo xunto con outra serie de proteccións para reducir ao interno", resume Julio Díaz, responsable na Lama do sindicato Tu Abandono Me puede Matar.

Conseguiron reducilo e levalo a un módulo de illamento. A liorta comezou, segundo nos confirmou este sindicato, por un impago de débedas. Entre elas podería estar o xogo ou os medicamentos que lle subministran para reducir a ansiedade, que eles mesmos deben administrarse por falta de persoal. Medicación que utilizan para vender e comercializar con outros reos.

"Non hai persoal sanitario suficiente para facer unha repartición diaria desa medicación. Polo cal danlle bolsiñas para catro ou cinco días e claro, persoas que teñen adicións, que eles mesmo administren estas medicacións psiquiátricas non dá moi bo resultado".

Denuncian esa falta de persoal e tamén o seu protocolo de agresións, moi laxo con estes funcionarios públicos.

"Se che cuspen, fanche a cambadela, danche unha labazada ou algo así, para a Secretaría Xeral non se considera agresión. Entón eles presentan unhas estatísticas onde din que todo é marabilloso".

Aseguran que este non é un caso illado xa que estes ataques, físicos e verbais, son unha constante.