A Xunta reduce o número de territorios con obriga de declarar a chegada a Galicia

Sanidade reduce o número de territorios cuxos viaxeiros teñen a obriga de declarar a súa chegada a Galicia. Segundo publica hoxe o Diario Oficial de Galicia (DOG), están exentos desta declaración os viaxeiros procedentes das illas Canarias e Baleares, das comunidades autónomas de Valencia e Murcia e das cidades autónomas de Ceuta e Melilla; para o resto das comunidades autónomas mantense a obriga de realizar a declaración ao Servizo Galego de Saúde (Sergas).

Dos países pertencentes á Unión Europea só se mantén a obriga para os viaxeiros procedentes de Dinamarca.

Para os países de América, a consellería de Sanidade obriga a que comuniquen a súa entrada en Galicia aos viaxeiros procedentes de Ecuador, Guatemala, Honduras, Nicaragua, O Salvador, Paraguai, Venezuela, Haití, Nicaragua e Xamaica.  

Os países asiáticos que figuran no listado da Xunta para que as persoas comuniquen a súa chegada son Bangladesh, A India, Irán, Iraq, Líbano, Palestina, Filipinas, Afganistán, Bután, Brunei, Camboxa, Indonesia, Laos, Mongolia, Myanmar, O Nepal, Paquistán, Siria e O Iemen.  

Segundo a listaxe publicada no DOG, a Xunta prevé a declaración obrigatoria para todos os países de África e exime a todos os de Oceanía.

Os viaxeiros que estivesen nos últimos 14 días nun destes países da listaxe teñen un prazo de 24 horas para comunicar a súa chegada, os seus datos de contacto e a súa estadía en Galicia. Pódeno facer a través da web https://coronavirus.sergas.gal/viaxeiros ou do teléfono 881 00 20 21.  

A Xunta lembra que esta resolución, que entrará en vigor este mércores, 12 de xaneiro, será obxecto de actualización nun prazo máximo de 15 días naturais.