A Xunta acusa o Goberno de modificar o regulamento de Costas "pola porta de atrás"
A Administración galega convoca o luns un encontro co sector para preparar alegacións á reforma promovida polo Executivo central
A conselleira de Medio Ambiente lamenta a falta de coordinación na xestión dos encoros e os ríos e di que a Xunta "máis pronto que tarde" debería asumir esas competencias
Arquivo (Europa Press)
A Consellería de Medio Ambiente e a Consellería do Mar convocaron os concellos do litoral do país, así como a todos os afectados pola regulación da liña de costa, a unha reunión este luns para avaliar e preparar as alegacións á proposta do Goberno central de modificar o regulamento de Costas.
Así o confirmou, en declaracións aos medios, a conselleira de Medio Ambiente, Ánxeles Vázquez, que criticou que este "terceiro intento" para modificar o regulamento fíxose sen publicidade, "pola porta de atrás" e dando "só quince días" aos afectados para presentar alegacións.
A conselleira afeou que o Goberno colgase este procedemento no seu portal de Transparencia "sen que ninguén se puxese en contacto absolutamente con ninguén", e asegurou que foi a propia Xunta a que alertou os concellos afectados.
"É unha falta de respecto institucional brutal", engadiu Ánxeles Vázquez, que ratificou que o luns terá lugar unha reunión de traballo para avaliar cos afectados en Galicia a presentación de alegacións.
Ante os medios de comunicación, a conselleira de Medio Ambiente lembrou que o Goberno leva desde 2018 "empeñado" nesta cuestión, que é, engadiu, "ilóxica", e que "non está baseada absolutamente en ningún criterio de carácter científico".
"E agora volven cunha escusa", engadiu a responsable de Medio Ambiente, que considera que a apelación para evitar unha multa de Europa polas prórrogas das concesións "é unha escusa máis" e "un despropósito".
Ánxeles Vázquez alertou das consecuencias que poderían ter estes cambios para as "propiedades privadas" que, "hoxe poden estar ben e mañá poden estar en dominio público marítimo terrestre sen facer ningún tipo de estudo".
"A min gustaríame saber que pasa se despois de investir nun fogar X millóns ou centos de miles de euros, de súpeto alguén di que xa deixa de ser privada para converterse en pública", dixo Vázquez, quen pediu "sensatez".
Competencias sobre ríos e encoros
A conselleira de Medio Ambiente tamén lamentou que non exista unha coordinación "como nos gustaría" á hora de exercer as competencias sobre os ríos do país, que están repartidas entre a Confederación Hidrográfica do Miño-Sil (CHMS), dependente do Goberno Central, e Galicia Costa, dependente da Xunta.
Facía esta afirmación logo de que o Tribunal Supremo rexeitara os recursos da CHMS e da Xunta contra a decisión que obriga as administracións de sanear de contaminación a área do encoro das Cunchas e o río Limia.
Vázquez dixo que "máis pronto que tarde, sentando todos nunha mesa debería ser a Xunta de Galicia a que tivese todas as competencias en territorio galego, no que se refire a ríos e a encoros".
