A UE pacta incluír a Garda Revolucionaria iraniana na lista de organizacións terroristas

Os ministros de Exteriores da Unión Europea alcanzaron un acordo político informal para incluír a Garda Revolucionaria de Irán na lista de organizacións terroristas da UE pola represión no país.

A alta representante da UE para Política Exterior indicou que a decisión supón un paso decisivo e que a represión non pode quedar sen resposta.

A decisión deberá formalizarse co apoio de todos os Estados membros

Tras o acordo político, a UE deberá aprobar de forma oficial a inclusión da Garda Revolucionaria na lista de organizacións terroristas.

Esta decisión require a unanimidade dos Estados membros.

Algúns países expresaran reservas nos últimos anos polo posible impacto diplomático da medida.

Desde a UE precisaron que a designación non afecta ás relacións diplomáticas nin aos contactos co ministro de Exteriores iraniano, polo que os canais diplomáticos seguirán abertos.

Á marxe deste acordo, o Consello da UE sancionou o ministro do Interior iraniano e xefe do Consello de Seguridade Nacional, así como o fiscal xeral, ao consideralos responsables da represión das protestas cidadás.

As sancións afectan tamén a outras persoas e entidades ás que a UE atribúe graves violacións dos dereitos humanos, incluíndo uso da violencia, detencións arbitrarias e intimidación contra manifestantes.

A lista inclúe tamén mandos da Garda Revolucionaria, responsables policiais e un xuíz.

Ademais, o Consello impuxo novas medidas restritivas contra persoas e entidades vinculadas ao apoio de Irán aos esforzos bélicos de Rusia en Ucraína.

A UE decidiu ampliar a prohibición de exportación de compoñentes e tecnoloxías empregados no desenvolvemento e produción de drons e mísiles con destino a Irán.