A UCO rexistra a casa do exministro Ábalos en Valencia

A Unidade Central Operativa (UCO) da Garda Civil está a rexistrar desde primeira hora deste martes a casa do exministro José Luis Ábalos en Valencia no marco da investigación aberta contra el no Tribunal Supremo polo denominado caso Koldo.

Segundo informan a EFE fontes xurídicas, os axentes do instituto armado buscan no domicilio do exministro de Transportes documentación sobre contratos de obra civil, unhas dilixencias que polo momento se manteñen baixo secreto.

É a primeira vez que a UCO rexistra unha propiedade do tamén exdirixente socialista, investigado no Alto Tribunal por presuntos delitos de organización criminal, tráfico de influencias ou suborno na causa que comezou ao redor de supostas comisións en contratos de máscaras en plena pandemia, pero que se estende tamén a posibles irregularidades noutros contratos.

Segundo as fontes, a documentación que busca a Garda Civil no domicilio que ten Ábalos na cidade de Valencia estaría relacionada con algunhas das supostas comisións ás que aludiu o empresario e presunto conseguidor da trama, Víctor de Aldama.

Aldama, tamén investigado no Tribunal Supremo, apuntou ao suposto pago de comisións a altos cargos e falou de obras preadxudicadas vinculadas ao Ministerio de Transportes en diferentes declaracións xudiciais.

A primeira desas declaracións traduciuse na súa saída de prisión por outra causa xudicial que pesa contra el -unha presunta macrofraude no sector de hidrocarburos- tras chegar a un acordo coa Fiscalía Anticorrupción.

O maxistrado do Supremo Leopoldo Puente ordenou hai meses unha investigación patrimonial sobre o exministro Ábalos. En resposta, a UCO remitiu ao alto tribunal un informe preliminar con "información básica patrimonial e financeira". Ese informe derivou noutra petición do xuíz á Axencia Tributaria e a unha entidade bancaria para que ampliasen a investigación patrimonial co obxectivo de saber se nas contas de José Luis Ábalos se produciu "algunha clase de ingresos irregulares".