A princesa presidirá xunto aos reis por primeira vez o desfile do Día das Forzas Armadas
Trátase da primeira ocasión en que a princesa de Asturias, que ultima a súa formación militar na Academia Xeral do Aire de San Javier, acompañará os reis neste acto do Día das Forzas Armadas
O Día das Forzas Armadas celébrase en España desde 1978 como un acto institucional cuxa finalidade é render homenaxe aos Exércitos e a Armada, para fomentar o seu coñecemento por parte da sociedade
Eduardo Parra/Europa Press
A princesa de Asturias presidirá por primeira vez xunto aos reis o vindeiro sábado o desfile militar que se celebrará en Vigo, o acto central co que se conmemorará o Día das Forzas Armadas 2026.
Segundo informou este mércores a Casa do Rei, este acto, que estaba previsto inicialmente coa asistencia dos reis, contará tamén coa presenza da princesa de Asturias, un desfile en que participarán militares dos tres Exércitos e da Garda Civil.
Trátase da primeira ocasión na que a princesa de Asturias, que ultima a súa formación militar na Academia Xeral do Aire de San Javier (Murcia), acompañará os reis neste acto do Día das Forzas Armadas.
Aínda que os tres últimos anos a princesa xa vestiu uniforme militar no desfile que se celebra en Madrid o 12 de outubro con motivo do Día da Festa Nacional. Así, en 2023, cando iniciou a súa formación na Academia Xeral Militar de Zaragoza, acudiu ao desfile co uniforme do Exército de Terra, mentres que en 2024 asistiu aos actos como guardiamarina da Armada, como alumna da Escola Naval Militar. E en 2025 asistiu co uniforme de alférez do Exército do Aire e o Espazo.
No desfile do Día das Forzas Armadas do próximo sábado en Vigo está previsto que participen 3.746 integrantes da Garda Real, Exército de Terra, Armada, Exército do Aire e do Espazo, Garda Civil e Unidade Militar de Emerxencias.
O Día das Forzas Armadas celébrase en España desde 1978 como un acto institucional cuxa finalidade é render homenaxe aos Exércitos e á Armada, para fomentar o seu coñecemento por parte da sociedade.
O día anterior, o venres 30, o rei presidirá, desde o buque de acción marítima Audaz a revista naval na que barcos da Armada e a Garda Civil navegarán pola Ría de Vigo e, posteriormente, desembarcará e trasladarase á praia de Samil, onde terá lugar unha exhibición dinámica de capacidades aeronavais. A exhibición incluirá manobras dos medios do Exército de Terra, da Armada, do Exército do Aire e do Espazo, da Garda Civil e da Unidade Militar de Emerxencias que operan en contorna marítima.
