A participación ás 18:30 é do 53 %, case catro puntos menos ca en 2019

A participación ás 18:33 horas nas eleccións deste domingo é do 53,12 %, o que supón 3,73 puntos menos que a rexistrada ao redor desa hora nas últimas xerais, celebradas o 10 de novembro de 2019, cando se situou no 56,92 %.

Así o informaron en rolda de prensa no Centro Nacional de Difusión de Datos Electorais o secretario de Estado de Comunicación Francesc Vallès e a subsecretaria do Ministerio do Interior Isabel Goicoechea.

Non ten en conta este dato o voto por correo, que chegou a cifras históricas nestes comicios: 2,47 millóns de electores enviaron a súa papeleta antes deste domingo.

Por iso, segundo recalcou Vallès, non se poderá saber exactamente a participación ata que se reconte o voto por correo, que se realizará nada máis pechar os colexios, que o farán ás 20:00 horas.

Lembrou que o voto por correo é nesta ocasión o dobre que nos anteriores comicios.

Nin Vallès nin Goicoechea quixeron opinar sobre este descenso na participación nin especular se iso se debeu a que os electores están a esperar a última hora para votar, ben pola calor ou porque volvan dos seus lugares de vacacións ou de fin de semana.

Respecto á calor desta xornada, que deixou once comunidades autónomas en alerta amarela ou laranxa, os representantes do Goberno indicaron que os concellos arbitraron as medidas pertinentes e non se rexistraron incidentes destacables.