A hostalería comeza a ponte de maio coas reservas completas

A hostalería mira ao ceo nesta ponte de maio despois dunha Semana Santa pasada por auga. "Esperemos que veña moita xente e que o tempo acompañe. Por sorte temos as reservas completas", di un hostaleiro de Cabanas.

Son días de moito traballo para un sector que xa quenta motores para a tempada de verán. "Somos un lugar que recibe moitos turistas da meseta e esta ponte coincide con dous festivos na Comunidade de Madrid", explica Fernando Lombardía, un hostaleiro de Miño.

Á chegada de turistas únese este ano a celebración do día na Nai este próximo domingo. Unha xornada que moitas familias aproveitan para reunírense en torno a un xantar. É practicamente imposible pechar unha reserva para ese día. "Estamos a tope desde hai quince ou vinte días", aseguran os hostaleiros.

O sector traballa a contrarreloxo para ter todo a punto despois dos problemas de desabastecemento dalgúns produtos tras do apagamento.  "Houbo problemas cos xeados. Tamén con algúns mariscos e peixes e coa carne. Pero xa está normalizado", resumen os hostaleiros. 

Con reservas pechadas e as despensas surtidas, só queda agardar que o tempo primaveral acompañe na ponte.