Sae da UCI a vítima da agresión do Orzán

Unha veciña gravou o momento da brutal agresión desde a ventá da súa casa. "Eu o que vin foi que o mozo xa estaba derrubado e ceibábase con el. Primeiro deulle unhas cantas coiteladas, foi para atrás e volveu aínda con máis forza. Deulle varias patadas na cabeza e moitas máis coiteladas. O mozo xa estaba sobre un charco de sangue enorme. Dérono por morto. É certo que eu adiviñaba unha cara de satisfacción no agresor", explica a veciña que gravou o vídeo.

Cando o agresor había outras tres persoas. "Esas tres persoas non o agrediron. Pero tampouco fixeron nada por deter o agresor", engade a testemuña.

Os catro foron detidos, pouco despois, preto do lugar. Onte á mañá pasaban a disposición xudicial. O suposto autor das catorce coitelas entrou no xulgado de garda sen deixar de sorrirlles ás cámaras en ningún momento.

A maxistrada decretou para os catro prisión provisional, comunicada e sen fianza. Están investigadas por un delito de tentativa de asasinato ou consumado, dependendo da evolución da vítima. Porén, segundo o último parte médico, xa saíu de Coidados Intensivos, agora está ingresado en planta e evoluciona favorablemente.

Con esta son tres as agresións no Orzán nas últimas tres semanas. Os veciños consideran que o único xeito de frear a violencia nas rúas é incrementando a presenza policial.