Williot impuxo o seu desexo de seguir en Vigo por diante doutras ofertas
O dianteiro sueco do Celta renovou o seu contrato ata o 2029
Williot Swedberg compareceu diante dos medios despois de renovar ata o ano 2029 polo Celta. O sueco, que remataba contrato en 2026, impuxo o seu desexo de continuar en Vigo por diante doutras ofertas. "Díxenlle ao meu representante que esta era a mellor opción" explicou o sueco polo que se interesou, entre outros, o Stuttgart de Alemaña.
O dianteiro chegou moi novo a Vigo e custoulle entrar no equipo pero desde a chegada de Claudio está a ter moitos minutos e a marcar goles decisivos. Dez nas dúas últimas temporadas, moitos deles que valeron puntos para o equipo porque sempre aparece nos momentos decisivos.
"Sempre me quixen quedar. É un sitio moi bo polo estilo, compañeiros, afeccionados...", comentou a carón de Marco Garcés, o director deportivo. O factor Claudio Giráldez tamén resultou determinante ao consideralo "un adestrador que dá moitas oportunidades a todos os xogadores e que axuda moito dentro e fóra do terreo de xogo".
